Bo Nadal!!

Tempo de Nadal, tempo de lecer!! 🎅🎄

     
 

Xa está aquí o Nadal e, desde o EDLG do IES Macías o Namorado tentamos, unha vez máis, ofrecervos algunhas opcións para que gocedes nos momentos de lecer. Coma sempre, procuramos seleccionar información variada sobre as últimas novidades culturais para rapazada, mocidade e xente adulta. Tomade nota!

🎧 TWITCH

 

Tempo de Nadal, tempo de Divulgación!! 

 

Comezamos cun proxecto de divulgación científica en plataforma dixital, Balea Vermella, de Iria Veiga (psquiatra) e Javier Balea (químico). Twitch en galego que permite non só a divulgación en ciencia, senón tamén a posibilidade de comunicarvos a través do chat interactivo, para facer brincadeiras e establecer conversas. Premede na imaxe!

  

🎼 MÚSICA

Tempo de Nadal, tempo de Sons!!

- Neste caso presentamos o traballo deste grupo independente de música pop, disco e trap galego que comezou en 2019, chamado Verto. Está composto por Alberto Mira "Verto" e Fernando Peleteiro "Fer". Considerados un dos grupos máis escoitados de música pop en galego, tendo millóns de escoitas na plataforma Spotify.

Escoitade Oie Gayego aquí:

 

 

- Seguimos con novidades: a estupenda, a enigmática, a magnífica Su Garrido Pombo, quen, ao respecto dos seus traballos, di: ”o que fago é mesturar cousas, con letras propias, con poemas…”. Su presenta o seu último traballo, A Horta do Berbés, que podedes ver aquí:

                       

 

- O compositor rianxeiro Carlos Cernadas, fusiona folk e rock no novo traballo Castrexos, capítulo 2 do proxecto literario, histórico e musical, Sons of Exodus. Este novo álbum serve de banda sonora a un relato de fantasía histórica ambientado nunha aldea costeira hai máis de dous mil anos. Premede na imaxe do álbum!

     

 

📖 LIBROS

Tempo de Nadal, tempo de Lectura!!

A edición de 2021 dos Premios Xerais de narrativa recaeu na escritora compostelá Berta Dávila: galardón Joules Verne de Literatura Xuvenil con Un elefante na sala de estar, e premio Xerais de Novela por Os seres queridos. Podedes ler a reseña da Asociación Galega de Editoras aquí.

 

 

👉 PARA A MOCIDADE

 

- O Consello da Cultura Galega publica, en banda deseñada para os máis novos, unha historia baseada en feitos reais de dúas mestras galegas que protagonizan, en 1901, un dos primeiros matrimonios do mesmo sexo. A autora é Xulia Vicente.

- Dúas Moedas de Nuria Tamarit, trata dunha adolescente europea, Mar, viaxa a Senegal na compaña da súa nai onde descubrirá unha cultura moi diferente, unha paisaxe dunha beleza insólita e unha forma de vida peculiar e distinta ao que está afeita.

                      

- Mamá quero ser Ziggy Stardust de Iria Misa. Aine, de maior, sería igual que Ziggy Stardust, un músico marciano que podía ser todo o que lle dese a gana. Coa axuda de Thomas, o seu inseparable amigo imaxinario, íao lograr.

 

                  

- Mariquita: una historia autobiografica sobre la homofobia. Nesta novela gráfica e autobiográfica o autor, Juan Naranjo, narra a historia da súa vida na que moitas persoas se verán identificadas.

    

 

- Ardora, de Beatriz Maceda, obtivo o II Premio Mª Victoria Moreno de Literatura Xuvenil. Cando as nais de Nereida marchan de xira, ela e máis os seus irmáns Andón, Magana e Kuru, quedan ao cargo da súa tía Lola. Terán unha vivencia que marcará as súas vidas para sempre e que lles ensinará a importancia de coidar dos nosos mares e das criaturas que neles habitan

- Oito días sen Eva Cortés, Editorial Galaxia. Premio de narrativa Illa Nova 2021, escrita por Sara Vila Alonso. A desaparición dunha rapaza en Pontevella sacode á cidade mentres a prensa local comenza a furgar na súa vida familiar e nas relacións persoais.

- O Círculo Escarlata, de César Mallorquí, trata dun adolescente aficionado á literatura de ciencia ficción e durante unhas vacacións cos primos, descobre un misterio que se remonta a varios séculos atrás.

 

                 

👉 PARA A IDADE ADULTA

- Golpes de Luz, é a última novela de Ledicia Costas. Unha novela tenra e chea de humor sobre os segredos que marcan a vida de tres xeracións dunha familia na Galicia rural.

 

               

- Receitas de inverno desde a comunidade. A premio Nobel Louise Glück sorpréndenos con este poemario traducido ao galego. É un libro sorprendente. A través dos seus poemas, Glück, colócanos ante a fiestra do único que realmente coñecemos: A VIDA.

                 

🎬 CINEMA

Tempo de Nadal, tempo de Ficción!!

- Valentina, película de animación dirixida por Chelo Loureiro. Primeira película galega cunha protagonista con síndrome de Down que quere ser trapecista e pensa que por ter este trastrono non o conseguirá.

- A directora de cine, Ángeles Huerta, dirixe o filme de ficción O corpo aberto, baseada no relatos Arraianos de Méndez Ferrín. Lede a noticia de filmax aquí.

 

A directora Ángeles Huerta, xunto ao actor Tamar Novas

...........................................................................................................................................................

 

💁🏻‍♀️ Estas son algunhas das suxestións que vos ofrecemos para que para que teñades un Nadal máis entretido, ameno e divertido. Esperamos que sexa unha lisataxe útil e atopedes opcións do voso agrado. 🤗📝

🥳 E xa para rematar, queremos felicitarvos estas festas, tomando prestada a postal que elaboraron no noso querido e admirado IES Félix Muriel de Rianxo:

 

Os nosos mellores desexos a todas as persoas que seguides este blog!! 

 

MOI BO NADAL e FELIZ 2022, que veña cargado de boas novas e sobre todo de moita saúde!!

A Palabra do Ano 2021

                  

 

 

🤓 A Real Academia Galega e a Fundación Barrié abren, a través do Portal das Palabras, a fase de votación popular para escoller a Palabra do Ano 2021. Tras a fase de recollida de suxestións, as voces finalistas que optan a se converter na Palabra do Ano 2021 son:  

                                  coada, gromo, resiliencia, tanxugueiras, vacinódromo

⏳ O prazo de votación permanecerá aberto ata as 23:59 horas do sábado 25 de decembro de 2021 nesta ligazón:

                                    👉 http://portaldaspalabras.gal/palabradoano/

Anímate a participar!!

Días de cine e museo

🤗 Esta semana saímos a Santiago de Compostela co alumnado de 1º ESO!

🎬🍿 O EDLG organizou unha visita ao NUMAX, para participar con este alumnado no seu programa, NUMAX na escola, nesta ocasión para ver a película "O Principiño", en francés e subtitulada en lingua galega.

🌍🌱🦅 Ademais, este equipo contou coa colaboración do departamento de Bioloxía e Xeoloxía, posto que a saída se completou coa visita guiada ao Museo de Historia Natural Luís Iglesias. A rapazada coñeceu a sección de zooloxía, botánica e xeoloxía deste espazo, coñecendo a biodiversidade que ofrece, e tamén a colección de minerais e rochas que alberga, do que máis lles impresionou.

 

       

25N, Día internacional para a eliminación da violencia contra as mulleres

💜 25 DE NOVEMBRO

Nesta data tan relevante, faise preciso levar ao alumnado a importancia de ter tolerancia cero ante calquera actitude machista. Por desgraza, moitas veces rematan en casos terribles de violencia.

O EDLG quixo contribuír, como cada ano, á conmemoración deste día con varias achegas que amosan o seu firme e claro compromiso con esta causa. Agradecemos ás alumnas que participaron a súa boa disposición e interese por formar parte desta proposta.

Matilde Pena, coordinadora deste equipo, escribe este manifesto, tan necesario e imprescindible na coeducación do noso IES, para conseguir unha sociedade igualitaria, respectuosa coas mulleres, sen violencias machistas. Presentamos así Abrindo portas... "quererte é a chave", coa marabillosa voz da nosa alumna de 2º Bacharelato Naiara Romero Morono: 

Abrindo portas... "quererte é a chave"

O seguinte poema, Perdémonos na primavera, escrito tamén por Matilde Pena, foi interpretado pola nosa alumna de 4º ESO Saray del Río Pérez, magnífica neste vídeo que podedes ver aquí:

 

 

Tamén o EDLG colaborou co centro na organización da semana de actividades relacionadas co 25N. Visitou a nosa Biblioteca a xornalista e escritora galega Montse Fajardo, autora de obras como Invisibles ou Matriarcas. Presentada pola poeta Rosa Enríquez, profesora de Francés do noso centro e sempre fel colaboradora do equipo, a autora falou coa rapazada sobre o machismo e a violencia nas relacións, e o indispensable que é rexeitalo e denuncialo.

 

                 

 

Para saber máis sobre ela, deixámosvos esta entrevista que recentemente concedeu a Orgullo Galego:

 

 

👉 Por último, unha ligazón ao post do curso pasado, onde atoparedes máis información sobre este día (por exemplo, a historia das irmás Mirabal): preme aquí! Non esquezas visitar tampouco a nosa XANELA VIOLETA.

SOMOS PANDEIRETEIRAS!!

💜 Que sorte a nosa poder formar parte deste grande proxecto: SOMOS PANDEIRETEIRAS.

Este martes o alumnado de 3º ESO viviu unha experiencia cultural moi diferente, cuxo obxectivo foi empoderar ás mulleres pandeireteiras. E claramente se conseguiu.

Dirixidas por Ana Fernández e Mercedes Peón, e axudadas por 5 rapazas pandeireteiras da asociación cultural Rosalía de Castro de Padrón, lograron crear un obradoiro no que aumnado e profesorado puido gozar da música e tradición galegas. Primeiro, escoitando a Ana falando da orixe e do contexto das pandeireteiras e do lugar que ocupan hoxe, da importancia da transmisión oral e do imprescindible que se fai conservar ese legado.

Agracedemos ao centro ter apostado por este tipo de iniciativas, e aos departamentos de Música, Bioloxía e Xeoloxía e Lingua Galega a súa colaboración.

👀 Velaquí as probas de todo o talento musical que vivimos nese salón de actos!!:

 

XII Día da Ciencia en Galego

📆 👩‍🔬👩‍⚕️Desde o ano 2010 celebramos en novembro o Día da Ciencia en Galego.  

En realidade, o mes de novembro é o escollido por Igaciencia para reivindicar o uso da nosa lingua nas disciplinas científicas e tecnolóxicas.

Velaquí o cartaz desta edición, a XII, dedicada á economía creativa para o desenvolvemento sostible, á intelixencia artificial e aos novos poliedros.

Relacionado con esta temática, lembramos a entrada que fixemos sobre Sabela Ramos Garea, a enxeñeira informática padronesa experta en machine-learning.

Non queremos perder a oportunidade de deixar tamén o capítulo de "Novas voces para a lingua", dispoñible na páxina da Real Academia Galega, no que a psiquiatra Iria Veiga charla co xenetista Ángel Carracedo. Ambos reflexionan sobre o rol que a lingua xoga actualmente no mundo científico nestes case 6 minutos titulados Conseguiremos a alegría de descubrir.

 Novembro, e todos os meses do ano, polo dereito a gozar da ciencia e a tecnoloxía en galego!

Parabéns, Guadi

👏 Moitos parabéns, Guadi!

Guadi Galego, imaxe tomada de descubreas.com

A nosa admirada Guadi Galego, vén de ser galardoada co Premio Meninas, pola súa implicación na loita pola igualdade, "utilizando a arte como transformación social e vehículo no seu compromiso contra a violencia machista". 💪💜

A artista galega comparte esta distinción coa Federación de Asociacións de Mulleres Rurais de Galicia (Fademur), o Foro Feminista de Lugo, Xeracción Sociedade Cooperativa Galega e Pomba Rodríguez a título póstumo.

🎼 Aquí tedes o vídeoclip do seu tema Matriarcas. A darlle ao play!

Ons, primeira película de Netflix en galego

🎞️🎥 O pasado mes de outubro coñeciamos unha noticia que nos alegrou moito: Ons, filme do que xa falamos neste blog (lembra a entrada), convertíase na primeira película dispoñible en galego na plataforma Netflix. Bravo!

O malo: a única!  🤷‍♀️

               

 

 

Acompaña entón esta película á serie O sabor das margaridas, tamén dispoñible en galego.

 

Que nos dicides? Animádesvos a unha finde de audiovisual en galego? 🍿

Regresamos polo Samaín!

Estamos de volta! 👋💜

😞 Por diversas circunstancias, e moi ao noso pesar, regresamos dun xeito discreto este ano. Botarase moito de menos a presenza de varias mulleres que conformaban o EDLG e participaban tan activamente na dinamización da nosa lingua no Macías. Para elas, GRAZAS INFINITAS.

Mais... ao mal tempo, boa cara! 😊

🎃💀👻 É por iso que compartimos esta imaxe do mestre do humor Davila o Bichero, para darlle un toque cómico a este Samaín de medo.

Deixámosvos varias imaxes das xornadas e actividades que se celebraron na Biblioteca, organizadas polo equipo que a coordina e tamén polo centro: preme aquí para acceder ás fotos que publicamos na galería da páxina web do IES.

Ademais, aquí tedes as curtas de animación de terror que se lle proxectaron ao alumnado de 1º ESO:

                                     

SAM´S "THE WEREPIG (O GÜEREPORK)" from IB CINEMA Motion Picture Films on Vimeo.

Para saberdes máis acerca desta tradición, da súa orixe e relación con outras celebracións, bótadelle un ollo a esta noticia ou premede nesta ligazón. Tamén vos convidamos a pasarvos polo blog da Biblio e estar ao tanto das actividades e concursos que alí vos teñen preparados.

Que teñades un horripilante Samaín!!

Orgullosas da nosa lingua, mergullámonos nela

 👍🙋Rematamos este curso facendo referencia ao que nos move, nos envolve, nos pon a flote a pesar das dificultades. Estamos a falar da lingua que nos permite mergullarnos e rexurdir unha e outra vez.

Ilustración de Leandro Lamas

Vestímonos de mar

Como explicar que non nos doe a historia deste país, tantas veces silenciada?

como suplantar as nosas palabras de lingua afogada, esquecida

sen grande dor?

Como rebelarnos contra a auga que nos atrapa?

Como resistir ante a corrente efémera que nos arrastra

sen sucumbir ao  temporal?

Este ano, vestímenos de mar,

para vogar -en contra do vento-

falando a lingua que nos identifica como pobo,

como terra, como cultura.

A nosa identidade, a cotío desprotexida, usurpada,

tentan calarnos

          invadirnos,

                          ignorarnos

mais nós

          irreverentes

                           furiosas

                                      combativas...

                                                               Somos de mar!

Doe a matria perdida e asolagada,

afogada e mergullada por tantas outras,

doe non escoitar a música das caracolas, agora silenciadas.

Doe a pel ferida de nostalxia,

de tanto navegar ao bambeo das ondas, sen rumbo

doe arar na marusía e non ter froito.

                                                             Son de mar!

Tentamos evitar a utopía, como se de algo irrealizable se tratara,

como heroínas dun naufraxio,

acreditamos nela para non esmorecer, tenderlle a man.

Somos inadaptadas no propio país,

Somos mulleres bregadas, de sal, feitas para resistir.

Sereas con horizonte claro para chegar ao porto.

                                                      Somos de mar!

Todas, somos poucas para garantir a súa supervivencia

tenderemos redes afectos, ronseis de empatía, de ilusión...

para defender a liberdade do que cremos xusto.

Como prescindir das miñas palabras?

area      rocha      dorna      argazo      arela      cuncha...

como negar a miña voz, a miña pel, a miña orixe?

Lembrade 

                                                   Son de mar!

Abride a fiestra, preciso respirar,

abride a fiestra que quero ver o mar, dicía a poeta

a nosa poeta!!

                                                  Era de mar!

                                                                                                       Matilde Pena (Coordinadora do EDLG)

Con este poema, Vestímonos de mar 💦, agradecemos ás profas e alumnas partipantes no blog 💜, ás 4000 visitas💥 que visualizaron este blog.

                              

Tempo de lecer, tempo de ler

💁‍♀️📖 Antes de coller as ansiadas vacacións, non podían faltar as recomendacións literarias do EDLG do Macías. Tomade nota!! 📝 

 1º ESO

• Douche a miña palabra de Fran Alonso. Editorial Xerais.

1º e 2º ESO

• Rumbo a Grecia sen poción máxica, da colección Astérix, Astérix nos Xogos Olímpicos (sobre a dopaxe no deporte).

DE 1º A 4º DE ESO

• As rapazas non saben pegar de T.S. Easton, as decisións dunha moza de 15 anos despois dunhas clases de boxeo. 

BACHARELATO E PERSOAS ADULTAS

• Tiven a chave, a bicicleta e os catro libros, da investigadora Xoana Pintos, da Editorial Galaxia. Achega que pon o foco nas primeiras mulleres científicas e os prexuízos que tiveron que vencer na Universidade.

• Celtas, castrexos e romanos. Á procura dun pasado na historia de Galicia de Francisco González García, Editorial Xerais. Libro histórico que plantexa onde se sitúan as orixes dos galegos.

As Ladras premiada en Olloboi

🎥🎞️🏆 O festival audiovisual Olloboi vén de fallar os seus premios, entre os que destacamos a curta documental gañadora, As Ladras, de Daniel Vázquez Fernández e Ángela Taboada.

Moitísimos parabéns polo merecido galardón!

Novidades musicais para gozar no estío

 💁‍♀️🎧Se seguides o blog, de seguro que sabedes o que nos gusta estar á ultima nas novidades musicais. Aquí tedes unhas cantas propostas, esperamos que gocedes con elas tanto coma nós! 

• Reggae en galego

A banda High Paw e Elephants Yard tira novo proxecto musical cun novo estilo, o CD que leva por título Novas Herbas.

• Baiuca estrea Embruxo

Álbum conceptual de Baiuca sobre a Galiza máis ancestral (folk e música electrónica).

• Trilitrate publica Está de grelo

Rubén Abad, Marcis Padía e Elena Vázquez sacan o 3º álbum de folk experimental (mestura de country e flamenco).

• Pauliña e os seus Remordementos

Remordementos é o novo traballo desta artista emerxente. Mestura de estilos (reggae e punk) e letras (amor e loita).